d'spezi
 Home | Sponsoren | Gästebuch | Kontakt | Sitemap | Impressum | Links Seite drucken
  -> Home

Wenn d'Schnägge verwache...

Wenn e Schnägg duet über Schnägge schriibe
Het är oft dr Hang zum übertriibe
Denn Schnägge git’s in jeder Form
Bi uns allerdings gheye si us dr Norm
Si bliibe lang im Schnägge Huus
Und mache dört dr Winterpfuus
Bis…und das liggt uf em Tisch
In Oberwil wieder Fasnacht isch
Denn isch me fertig mit em pfuuse
Und streggt sini Fühler wieder use
Als erscht’s und das sig so empfohle
Sott me s’Koschtüm füre hole
Dr Eint oder Ander leggt’s wieder ewäg
Är kunnt nümm dry wägem Winterspägg
Do git’s nur Eins zum Schnyder kamme
Oder het dehei e liebi Mamme
Wo sich mit em usloh umeschloht
Damit s‘ wieder umme Ranze goht
Nodürlig stülpsch denn au no gschwind
S‘Zweit Gsicht d‘ Larve übere Grind
D’Zoggeli seh’n us zem schreye
Die kasch ins Fasnachtsfüür go gheye
Wo bisch mit däne ummeglääge
Jo bruuchsch neui suscht stosch im Räge
Dr Räscht wird langsam no dis no
Au gründlig unter d’Lupe gno
Isch alles priefft und ka so bliibe
No machsch di no ans Sujet schriibe
Das macht me zämme in dr Clique
Eins wo zum Koschtüm basst däm schigge
Bisch e Einzelmasgge oder Gugge
Bruuchsch meischtens keini Zeedel drugge
Bisch Bänggler sottsch Papier go hole
Wo druf kasch dini Helge moole
I hoff de könnsch es denn au richte
Die passende Värs derzue no z’dichte
 
Ghörsch zu de Waggis wo vom Waage schreye
Bruchsch Material zum use gheye
E chli Wysse e paar Ten Päggs Hopfe
Und Räppli dass kasch d’Chätzli stopfe
Aber s‘härzigscht us dr Narre-Sparte
Find ich Gnäggis usem Kindergarte
I stell mr vor und zimmlig guet
Wie säll glai Härzli böpperle duet
Wenn’s an Umzug goht im Unglichschritt
Und me riefe ka - gäll kennsch mi nit
E Hampfle Räppli in dr Hand
E lache wenn‘s öpper trifft am Stroosserand
Für d’Räppli in dim Gsicht griegsch top
Als Troscht e siesse Lollipop
Anderi dien am Koschtüm fummle
Oder haue wild uf Ihri Drummle
E ander Mäsggli wo kasch gseh
Rieft Mami i ha keini Dääfi meh
Zwüsche Clique Wääge Gugge
Sesch sich die Binggis duerdrugge
De ghörsch das herrlig Kinderlache
Die Freud well me dörf Fasnacht mache
I wünsch mr Eins dass au die Alte
Die Freud an unserer Fasnacht bhalte
I sag’s e so wien ich’s do mein
Das wäg de Alte- i bi au Ein
Es git Sache wo eim zämmeschweisse
Wenn’s wieder vorwärts Marsch duet heisse
Am Schmutzig Donnschtig wird das sy
Denn lüte mir d’Fasnacht wieder y
S’FasnachtsGlöggli Nummere Sächs
Bringt Frytig Samschtig ihri Gägs
Am Sunntig pünggtlig halber Drey
Isch d’Hauptstrooss für dr Umzug frey
Und schliesslig wärde vo dr Gosche
Am Dsischtig z’Obe Värsli drosche
Dr Sunntig druff gosch mit dim Müüsli
Mit Faggele und dim Schnäggehüsli
Nachdäm s’Glöggli wie e schön Sonett
Unseri Fasnacht denn usglüüte het
Ans Fasnachtsfüür go Abschied nä
S'wird wieder füechi Auge gä
Wenn's Adie Fasnacht tönt im Chor
Mir sind gschpannt uf's näggschte Johr
Ihr alli sind hoffi au wieder derby
Die fünft Johreszyt isch nämmlig gliy
Viel Spass bim Baschtle und bim Gschtalte
Wünscht eu eine vo de Alte.
 
Peter Wyss
WEB-Design COMASYS Mittwoch, 25. Januar 17 / Copyright © d'Spezi, alle Rechte vorbehalten

Valid XHTML 1.0 Transitional