Troffe hän mir uns am Donnschtigobe in der Bahnhofhalle in Basel. Jede het e chlini Schtärkig zue sich gno und den isch es beräits Zyt gsi zur Abfahrt.

Am halbi Achti hän mir d Fahrt über Züri nach Schladming in Agriff gno.

D Verpflegig für unterwägs het de Achim für uns vorberäitet, so dass käine verhungeret isch. Danggscheen viel mol!

Am viertel noch Vieri am Morge sin mir in Schladming acho. E churze Ufenthalt im Nachtläbe vo Schladming hän mir iglegt und denn sin mir am sächsi am Morge zum Kerschbaumerhof- unser dehäi für die nägschte zwäi Nächt - go bezie. Aschliessend hets für alli e guets Zmorge gä.

S Programm het verschiedeni Aktivitäte vorgse. Die Äine sin Schladming go unsicher mache und die ander häns vorzoge go Schi z fahre.

Ab de halbi zwäi het den den Horscht (Käpt'n Klug und die Zwergsteirer) uf de Schofalm si Uftritt gha und mir sin natürlig Alli vor Ort gsi.

D Schtimmig isch vo Afang a super gsi und de Horscht und si Truppe hän alles gä.

Aber au mir hän älles gä und ganz bsunder de Suchi. Äifach super hesch das gmacht.

Denn isch de Uftritt vom "Rotchäppli" em Achim cho. E lang vorberäitete "Spontanuftritt". Wenn de im Schwane so singsch, hesch din Lade sicher au so voll wie uf de Schafalm.....

d Skifahrer händ am Samschtig uf de Almrausch e ganze häisse Uftritt dörfe gniesse. D "Nichtskifahrer" sin sälber Schuld gsi, das si nit hän chöne derbi si.

D "Nichtschifahrer" hän em Apréschi an de Talstation vo de Planai-Hochwurzen gfröhnt. Au do isch d Schtimmig wieder super gsi und de Suchi het am Vortag aknüpft.

De Sunntig sin Alli e chli gmüetliger agange. Die Äinte hän pokeret und die Andere sin abe ins Tal äine go schnappe.

Am Mäntigmorge am viertel noch Äins isch denn de Zug in Schladming wieder zrugg noch Basel gfahre.

Alli sin sich äinig gsi, dass es e würdige Jubiläumsbummel gsi isch.

 

Em Organisator vo däm Jubiläumsbummel sig an dere Schtell die gueti Organisation beschtens verdanggt.