d'spezi
 Home | Sponsoren | Gästebuch | Kontakt | Sitemap | Impressum | Links Seite drucken
  -> Anlässe / Bummel 2011

Träfpungt isch am 10:00 bim Bahnhöfli in Oberwil gsi. S erschte Trämmli hän mir gemäinsam beschtige und sin gschpannt gsi, wo's ane goht.

De Zolli Basel isch s erschte Ziel gsi.

De Reto het Löösli vertäilt und d Gruppe vom vorberäitete Wettbewärb sin feschtgschtande.

Mir händ Poschte für Poschte bsuchet und jedi Gruppe het uf sini Art versuecht d Ufgobe z löse.

S Mittagässe hän mir im Restaurant im Zolli gmäinsam igno.

Dä gfiderti Kauz do isch au e Beschtandteil vom Wettbewärb gsi und unser Hansi het mit em "lanchender Hans" e neue Fründ gfunde.

Jedi Gruppe het noch em Ässe ihre Zedel fertig usgfüllt und sich in de Bäiz nomol gschtärkt. Aschliessen het me sich bim Usgang troffe und denn isch es witter gange zur Trämlistation Wettschtäiplatz.

Uf em Wäg an Rhy abe sin mir bim Münschter verbi ko. Da Oberwiler-Vogel hän mir unterwägs au no atroffe. Schön stramm bisch gschtande. Mir sin beidruggt gsi.

Mir sin ans Rhybord abe und hän uns ufgmacht mit de Münschter-Fähri de Rhy z überquere. Es isch nit lang gange und mir hän chönne ischtige.

Kum im "mindere Basel" ako, hän mir de Wäg zur Uelistube igschlage. 2-3 Bierli hindere kippe und scho sin mir parat gsi für e Füehrig dur die Klybasler Brauerei.

Sin die Bilder e chli verwacklet wägem Fotigraf oder hän's scho alli e chli verschwumme gse?

Nomol 1-2 Bierli und scho ischs wieder witter gange. Jetzt het de Benji s Zeppter überno. Mir hän uns uf e Wäg zum Wettschtäiplatz gmacht und uns Richtig Bahnhof Basel SBB verschobe.

No e churze Bsuech in de Kaffibar und scho hän mir unser Zug noch Baden chönne beschtige.

 

Es sig nur näbebi erwähnt, dass eine vo uns si Händy verlore het. De Sicherhäitsdienscht vo der SBB in Basel het's aber ins Troggene brocht und dä D'Spezi Giftschnägg cha scho wieder telefoniere......

De Benji het uns zum Bierfestival in Baden bei de Firma Müller Bräu inkl. Nachtässe iglade und het e so unseri Cliquekasse nit belaschtet.

 

"Benji de bisch de richtig Kassie"!

Immer schön uf de Schtütz hogge und mögligscht wenig usgä.

Uf em Wäg zrugg zum Bahnhof het's no e Rundi Clique-Getränk für alli gä. (????)

De Reto het uf de Häimräis no d Siegerehrig vom Wettbewärb vorgno. Es sin aber nit alli Täilnähmer devo überzügt gsi, dass es bim Wettbewärb immer mit rächte Ding zugange isch.........:-( Aber das isch jo au nit so wichtig gsi.

 

D Häimräis isch aber rächt ruhig verloffe und de äint oder anderi Bierträumli-Film isch beräits abgloffe.

WEB-Design COMASYS Donnerstag, 19. September 19 / Copyright © d'Spezi, alle Rechte vorbehalten

Valid XHTML 1.0 Transitional