D Vorberäitige für unseri Waagevernissage hän mir am Vorobe troffe.

 

S Mittagässe het uns de Achim vom Schwane offeriert was mir an dere Schtell beschtens verdangge.

 

Wie im 2011 isch au das Joor super Wätter gsi für unseri Waagevernissage 2012.

Es het gar niemer in Velochäller welle und unseri Gäscht und mir hän s schöne Wätter dusse gnosse.

Letschti Vorbereitige am Wage sin no gmacht worde.

D Gäscht hän sich dusse unterhalte und die warme Sunneschtrahle gnosse und alli hän uf d Aschproch vom René gwarte. Es het das Joor e chli länger duref bis är alli siebe Sache zäme gha het.

De René het's aber au das Joor gschaft und unserne Hälferinne und Hälfer für ihre Isatz unsere Dangg chönne usschpräche.

S Sujet isch vom Präsi vorgschtellt worde und natürlig au alli Mitglieder und unseri Fraue wo das Joor wieder mit de D'Spezi-Binggis am Sunntig unterwägs sin.

D Sunne isch e wägg gange und mir hän de Wäg in warme Vellochäller unter d Füess gno. Dört het's für Alli öbbis z ässe und z tringge gä.

Am Sunnti-morge het's de Petrus bim Waage lade mit uns nit guet gmäint gha. Es het "gschifft" und und mir hän alli uf besser Wätter ghoft.

S Wätter het sich während em Mittagässe bim Alisi und de Erika zum Bessere gwändet, d Sunnecreme isch gfroggt gsi und mir hän uns uf e schöne Umzug gfreut.

Mit e me volle Mage goht das bsunders guet.

Erika und Alisi, beschde Dangg für d Verköschtigung. Es het uns au das Joohr gmundet und mir köme s nögscht Joor gärn wieder .

Vor em Umzug hän mir bi de Patrizia e Gyn Tonic biko, sozage e Ufwärer für de Umzug und denn isch es los gange.

Noch em Umzug isch unsere Waage zur Benji-Bar umfunktioniert worde und de Benji het usgschängt bis är buechschtäblich ustroggnet gsi isch. Benji Du hesch das usgezäichnet gmacht und bisch fürs s nögscht Johr scho wieder gwählt.

 

S Nachtässe hän mir bi de Elisabet und em Roli biko. D Haxe vom Roli sind wieder eimol meh usgezäichnet gsi und es het e Käine vo uns mies de witeri Obe hungrig unterwägs si. Merci viel mol an die ganzi Rösslitruppe.

An de D'Spezi-Bar hat de Horscht mit de Isabel und de Ursula defür gsorgt, dass niemerts het müese verdurschte. Natürlig hän mir immer wieder emol ineglugt und eine zwitscheret.

 

Um Mitternacht hän mir uns alli bim Schümli in de Schiggi troffe und hän de Fäldschnäggli gholfe ihr Umsatzbudget izhalte.

 

Es isch e schöne Fasnachtssunntig gsi. Es het in der Nacht no e weneli gschneit, aber jede vo uns het irgendwenn de Wäg häi gfunde.

Noch em Chinderumzug hän mir uns bi de Elsbeth und em Roli im Rössli troffen. Spontan hän mir e Jass klopft, d.h. die äinte hän gschnurt und die andere hän gjasst. Gwunne hän aber die wo gjasst hän. Irgendwie isch s Läbe doch grächt.

Die äint oder anderi Dorfprominänz het me denn in de Schicki atroffe.

Vo de Schicki zur Silvia het de Wäg am Pub verbi gfüert. Natürlig hän mir au dört churz inegluegt und no äine gno.

S Ässe bi de Silvia isch - wie immer - sehr guet gsi und glängt het's au.

 

Aschliessend sin mir wieder zrugg ins Pub zum Däni dä het um Mitternacht nämlig Geburtstag gha und do hän mir mit ihm welle aschtosse.

De Zischtig isch im Zäiche vo de Schnitzelbängg gsi und mir hän dä Obe zäme mit unsere Fraue im Ambiente verbrocht.

Äi Bangg noch em Andere het si Ufwartig gmacht: Saggosche, Schabernack, Schnäggewaggis, Fäldschnäggli, Clochards, Ysheiligi, Schmeissfliege, Die Unerheerte, Babberläbap und Mc Värs.

 

Es isch e schöni Oberwiler-Fasnacht gsi. Adie zäme und bis zur Fasnacht 2013.

D Binninger-Fasnacht stoht bi de D'Spezi Giftschnägge im Zäiche vo de Kinder. Drum hän mir am Samschtig-Morge unsere Waage für unseri Kinder vorberäitet. S Wätter isch prächig gsi, so dass alli uf em Waage uf ihri Köschte cho sin. 

Do gseht mer d'Spezi-Delegation vor em "Baselbieter".

Es soll scho fascht gschäftsschädigend gsi si, wie unser "Chläiderschränkli" Hansi sich unter d Igangstürge gschtellt häig. Es sig nämlig fascht e käi vorbicho gsi.

De Böbbi als umbaute Samba-Waggis. S Original isch aber äidütig besser.......

Danggschon Simon fürs sichere Fahre an de Oberwiler- und Binninger-Fasnacht.

Mir sin froh, dass mir dich hän.

Au em Ueli Heyer dangge mir ganz härzlig für de Tragdor wo mir sit Johre als Zugfahrzüg zur Verfüegig gschtellt bechöme. Mir schetze das sehr. Läider hän mir dich an de Fansnacht in Oberwil und Binningen nit atroffe.

E Räpplisagg isch nämlig immer  für dich parat gsi.

An der Binninger-Fasnacht 2012 het Traumwätter gherscht. S Nachtässe hän mir wie in de vergangene Joor bim Boris biko. Danggschön viel mol für d Gaschtfründschaft. Es het uns guet gfalle. Adie Fasnacht 2012........ mir freue uns scho uf d Usgob 2013. Si findet bekanntlig jo no früener statt.