Bi schönschtem Wätter hän mir unseri Wagevernissage chönne vorberäite. Unsere Waage und dä vo de Binggis isch scho bald parat gsi und au de Waag vo de Bierschnägge isch bald itroffe.
E chläine Fähler isch de Waagebauer vom Schissdräggzügli unterloffe. De Umgang mit em Santimeter beherscht halt nonig jede vo uns. Das "Intermezzo" isch für die wo hän chönne zueluege natürlig e gfundnigs Frässe gsi und de Urs het sini Fötteli für unseri Homepage chönne mache. Die nägschte Joor hän jedefalls alli öbbis am Schtammtisch zum verzelle.
Si hän alles gä und die Zusatzufgob bravurös gmäischteret e voila scho isch das Zügli zur Besichtgun uf em Schuelhuusplatz Hüslimatt parat gschtande.
Zum Mittagässe sin mir vo Achim zum Mittagässe im Schwane iglade worde. Du hesch das usgezäichnet gmacht. An dere Schtell vo alle D'Spezi Giftschnägge e dreifachs Giftschnägge, Giftschnägge, Giftschnägge d'Speeeeeezi........!
Bald isch drei gsi und die erschte Gescht sin itroffe. A dere Schtell danke mir allne wo unser Büffet in irgend ere Form agricheret hän. Es het jedefalls für alli gnueg gha.
Au das Joor het d Silvia e Hüchlerbäse vom René beko. Dankschön vo de ganze Clique für's libliche Wohl.
S lade vom Wage isch wie immer rutiniert und schnäll vor sich gange und au de Benji het si Schiggeria bald igrichtet gha.
S Mittagässe hän de Reto, Benji, Peter, Simon und de Urs bim Alisi und de Erika biko.
Uf em Weg dört ane het unser Fahrer de Simon rutiniert do de Waage vo de Wäglitramper verschobe, so dass em Mittagässe nüt me im Wäg gschtande isch.
Läider sin die 5 Wägeler denn bald vo de "Häimwehbrieder" Hansi, Suchi, Adrian und natürlig em René bi de kulinarische Gnüss gschtört worde. D Enzugserschinige vo dene Häimwehbrieder sin offesichtlig scho so gross gsi, dass si's ohni uns nit usghalte hän...
S Ischto zäme mit em Schissdräggzügli isch problemlos gsi und d Schtimmig vor em Umzug hät nit besser si chönne.
Pünktlig het de Umzag agfange und alli hän gä was si gha hän. Jung und Alt het gägesitig profitiert und isch in d Fasnachtswält itaucht.
Noch em Umzug het de Benji sini Schiggi ufgmacht und si Gyn-Tonic het e rissende Absatz gfunde.
Denn isch de Horst vo uns a sinere D'Spezi Giftschnäggebar bsuecht worde. Är het alli Vorkehrige troffe, dass ihm de Gyn nit usgang isch. Horst, Du hesch die Ufgob suverän glöst!
S Nachtässe het uns de Roli und d Elisabet im Rössli zueberäitet. Die Haxe sin e Wucht gsi. Gross und guet, was wilsch no meh?
Natürlig hän mir noch em Nachtässe wieder turscht gha und sind de Horst und sini Crew vo Gyn und Tonic go befreie. Die mäischte hän usghalte bis si duregfrohre gsi sin.
De Mäntig hän mir am Nomitag bi strahlende Sunne im Garte vom Rössli agfange und uns vo de warme Sunnestrahle verwöhne lo.
D Nomitagsrute het uns vom Rössli in d Halle an d Chinderfasnacht und in d Schiggi (pardon Jägerstübli) witer ins Ambiente und ins Pub gfüehrt und s Nachtässe hän mir wie immer bi de Silvia biko. Merci viel mol, es het geschmeckt wie dehäi.
Die Eine hän de Wäg früener häi gefunde als die Andere. S Spiel vo de 10 kläine Negerli het agfange und äine noch em andere isch usgschtige. De Letscht sig am 6:00 am Morge d Bruederholzstroos duruf uf em Häimwäg gsichtet worde.
De Zischtig-Obe isch isch de Schnitzelbängg gwidmet und so hän mir uns zerscht für e Bierli in de Schiggi troffe. Aschliessed sin mir ins Bistrot Ambiente go loose. Es isch e sagschtarke Schnitzelbangg-Joogrgang gsi. Wär nit derbi gsi isch, dä isch sälbe schuld und s Ässe isch au excelent gsi. 
S Lade vom Wage für d Binninger-Fasnacht isch für uns - trotz Räge - Rutine gsi.
S Mittagässe bi de Silvia und de Sabine isch usgezäichnet gsi. (Merci viel mol!) und mit Kaffi und Sitewägeli hän mir uns uf de Umzug in Binninge vorberäitet.
Mir hän unsere Wage igräit und uf e Aschturm vo de Kinder gwartet. D Plätz sind frei für unseri Kinder und Enkelkinder sowie d Kinder vo unsere Passivmitglieder. S het Platz so langs het und es sin alli Plätz bsetzt gsi.
Kurz vor em Umzug het me sich fascht e chli Platz miesse schaffe, um e Platz bi de Chrippe und bim Wurfmaterial z biko.
Au de Räge het rächtzitig ufghört, so dass es e trockene Umzug für alli Fasnächtler und Bsuecher worde isch.
Au an de Binninger-Fanscht isch im Roman si Bar beschtens bsuecht gsi und vom nöchere Umfäld vo de D'Spezi Giftschnägge ufgsuchet worde.
S Nachtässe hän mir bim Boris im Higspees biko. Mit ca. 40 Persone hän mir de Boris und si Crew überfalle, aber si hän dä Aschturm vo uns beschtens gmäischteret. Merci viel mol!
Es isch e guete Joorgan 2011 gsi und mir freue uns scho ufs 2012. Bis bald!