Wie alli Johr sin mir au im 2010 am Frytigobe und am Samschtigmorge mit de Vorberäitig zur Waagevernissage beschäftigt gsi.

Zum Mittagässe sind mir vom Achim in Schwane zum Mittagässe iglade worde.

Mir dangge Dir ganz härzlig. Es isch wunderbar gsi.

Noch em Ässe isch es denn scho gli Zyt gsi und unseri Passivmitglieder und Sympatisante sin im Hüslimattschuelhus itroffe.

Am vieri isch denn de Uftritt vo de Gaschtronoome gsi. Wunderschöön und lut isch gschpielt worde.

Unser Präsi het wie alli Johr d Hälfer verdangt und allne Awäsende e scheeni Fasnacht gwünscht.

D Bierschnägge - si hän au das Joor mit uns d Waagevernissage duregfiert - hän uns zum Jubiläum gratuliert und e Gynfräueli in "Jubiläumsgrössi" gschänggt. Merci viel mol!

Am Sunntig-morge isch es drum gange de Waage z lade und für de Umzug parat z mache. Alli sin mit Ifer derbi gsi und so sin mir au das Joor wieder rächtzytig fertig worde.

Bim Alisi und de Erika hän mir wie in de vergangene Joor e feins Mittagässe und e Sytewägeli biko.

S Ässe isch wunderbar gsi und mir hän aschliessend gschtärkt de Oberwiler-Umzug förfe in Agriff nä.

Bim Ischto hän mir uns mit de Fuege-Fäger troffe. Si sin nämlig zu unserem "10-Jährige" als Vortrab am Umzug mitgloffe. E schöni Geste! Merci viel mol.

Den hän useri Fraue no de Hansi mit e me Geburtstagschueche und e me Schtändeli überrascht. Härzlige Glückwunsch zum Geburtstag!

Und scho isch es losgange. Mir hän gä was mer hän chöne und gä hän mir viel ............

De Waage sich bis an Rand glade worde und mir hän bis am Schluss Wurfmaterial gha. Sogar für de Urs hets dasmol glängt.

De Mäntig-Nomitag het de Chinder ghört und mir hän uns wie immer im Rössli bim Roland zum "Idringge" troffe. Aschliessend hän mir d Bierschnägge uf ihrem Waage bsuecht und ihri Bar fascht drogge glegt.

De Schnäggechäller isch während der Fasnacht fascht "D'Spezi-Hoheitsgebiet" gsi. De Cello het jedefalls nüt dergäge gha.

Vom Schnäggechäller isch es aschliessend de Hang ufe zur Silvia gange. Dort hets wie immer e super Nachtässe gä. Merci viel mol, mir chöme gär wieder.

Noch der Oberwiler- und Basler-Fasnacht isch es mit der Binninger-Fasnacht witter gange. Mir hän de Waage mit Wurfmaterial glade und gluegt dass de Waage für unseri Chinder parat gsi isch.

S Mittagässe hän mir traditionell bi de Silvia und em Benschi igno. Merci viel mol.

Denn isch es scho losgange. De Simon hat de Waage in Binninge igräit und unseri Chinder hän sich freudig ihre Platz uf em Waage erkämpft.

S Wätter het mitgmacht und d Chinder hän de Plausch gha.

S Nachtässe hän mir bim Boris im High Speed mit de ganze D'Spezi-Familie biko. Die mäischte vo uns hän de ganzi Obe do verbrocht.