Das Joor sind D'Spezi Giftschnägge an de Oberwiler Fasnacht nit alli mit unserem Waage unterwägs.

Drum sin e paar vo uns beräits dra unser Schissdräggzügli im Hüslimattschuelhuus zämme z stelle. Zerscht sin mir Manne im Isatz und zum Schluss gän unseri Fraue und d Chinder de Finschliff.

Au die wo das Joor uf em Waage Fasnacht mache, hän mit em baue agfange. Dr Ney bi uns, de Peter, isch grad mit em beschde Bischpiel vorus gange und het si Ufgob apackt.

Kum hän die erschte mit de Arbet agfange, scho isch de erscht cho ineluege und im Wäg umegschdande.....

Gmohlt isch au worde, öbbe glich viel Farb isch am Holz und an de Händ hänge bliebe.

De Peter het s erscht mol bi uns bim Wagebau mitgmacht. Är het sich super integriert und voll apackt. Me het schnäll gse, dass är nit zwäi linggi Händ het wie de Äint ode Ander vo uns. Bisch e ächti Verschtärkig!

Unser Präsi de René het sich zäigt und het gluegt, ob au alles klappt. Sichtlig zfriede het är e Kaffi trungge, obbis gässe und ist denn wieder verschwunde und mir hän chöne witerschaffe.

Natürlig isch es nid e so, dass mir e Präsi hän wo nüt macht. Er isch das Joor ganz eifach bim Baue vo unserem Schyssdräggzügli engagiert.

Bi +10° hän mir e supper Samschtig verwütscht und d Farb het au schnäll trocknet.

Zum Wagebaue ghört au s ine- und unsfahre vo unserem Wage. Das macht de Hansi sozsage vor sinere Huustüre und het somit e eigetligs Heimspiel. Du machsch das beschtens. Es isch wie immer bi uns, es macht jede das wo är cha.

Unseri Fraue hän inzwüsche mit Mohle agfange und d Chinder hän mit Begäischterig mitgmacht. No isch das Schissdräggzügli nit feritg, aber bis an d Oberwiler-Fasnacht isch alles parat.

Dr' Kinschtler bi sinere Arbäit.

De Simon, unser Fahrer isch mit sine Kinder cho ineluege. Är het eifach welle wüsse, ob dä Waage no grösser worde isch als s letztscht Joor und ob är für de Umzug no de Überblick cha ha. "Alles beschtens", het är gmäint.

De letzschti Waagebau isch bi schönschtem Wätter über d Bühni gange. De René und d Ursi und de Böbbi mit de Lea hän uns bsuecht und anerkennend e Schluss vom Waagebaue zuegluegt.

 

Es isch locker zue un här gange und alli hän gwüsst, dass es das Joohr käi hektische Ändspurt me git.

 

Drumm het de Horscht no e weneli Zyt, um sich um D'Spezi-Bar an de Oberwiler-Fasnacht z kümmere, wo är mit de Ursi betribe wird. Mir wärde dert sicher zu de Schtammgescht ghöre.

 

Luegsch dass de Gyn nit usgot, gäll Horst!

D' Ursi macht Wärbig für d'Spezi-Bar a de Oberwiler-Fasnacht 2011. (De Schtandort isch bim Parkplatz vom Carbone und em Coiffeur Portmann.)

Beinji was mäinsch, wird dä Pfoschte vor de Fasnacht no fertig?

Au Ehremitglieder mien sich ab und zue erlichtere, gäll Horst?

D'Finarbäit vom Chef persönlig.

Und de Ändspurt vo de Sabine und em Reto.

Me geseht, d'Arbäit isch gmacht und de Benji het Zyt sine eigene Gedanke noche z go. Bald isch Fasnacht und är taucht wieder ine i e anderi Wält.....

So das wärs vom Waagebau 2011. Mir sehn uns gli a de Oberwiler-Fasnacht. Bis am 6. März 2011